कर्णाली प्रदेशका नवनियुक्त मुख्यमन्त्री मंगलबहादुर शाहीले आज

मंगलबार कर्णाली प्रदेशका नवनियुक्त मुख्यमन्त्री मंगलबहादुर शाहीले आज बुधबार दिउँसो ३ बजे पद तथा गोपनीयताको शपथ लिने भएका छन् । प्रदेश प्रमुखको कार्यालयले शपथ समारोहका लागि आवश्यक तयारी पूरा गरेको जनाएको छ ।

कर्णाली प्रदेशका पाँचौँ मुख्यमन्त्रीमा नेपाली कम्युनिस्ट पार्टी (नेकपा) संसदीय दलका नेता शाही नियुक्त भएका थिए । प्रदेश प्रमुख यज्ञराज जोशीले नेपालको संविधानको धारा १६८ को उपधारा (२) बमोजिम उहाँलाई मंगलबार मुख्यमन्त्रीमा नियुक्त गरेका हुन् ।

प्रदेश प्रमुखको कार्यालयका सचिव हीरालाल चौधरीका अनुसार मुख्यमन्त्रीले दिउँसो ३ बजे शपथ ग्रहण गर्ने जानकारी दिएपछि कार्यालयले सबै तयारी पूरा गरेको छ ।

मुख्यमन्त्रीको शपथसँगै मन्त्रिपरिषद् विस्तार गर्ने विषयमा भने सत्तारूढ दुई दल नेकपा र नेकपा (एमाले)बीच छलफल जारी छ । मन्त्रालयको भागबन्डा, मन्त्रीको सङ्ख्या तथा जिम्मेवारी टुङ्ग्याउन दुवै दलका नेताबीच निरन्तर छलफल भइरहेको जनाइएको छ ।

दुवै दलबीच सहमति जुटेमा मुख्यमन्त्रीको शपथलगत्तै केही मन्त्रीले पनि पद तथा गोपनीयताको शपथ लिने सम्भावना रहेको छ । यद्यपि मन्त्रालयको बाँडफाँट र मन्त्रीहरूको नाम भने अझै टुङ्गो लागिसकेको छैन ।