रिसाङ बाढीपहिरो : ८९७ जना प्रभावित राख्न मकैखेती मासेर सेल्टर बनाइँदै

जाजरकोटको भेरी नगरपालिका–२ रिसाङमा बाढीपहिरोबाट विस्थापित भएका परिवारलाई राख्न मकैखेती मासेर अस्थायी सेल्टर निर्माण सुरु गरिएको छ ।

पहिरोका कारण घरबास गुमाएका तथा जोखिममा परेका १६८ घरधुरीका ८९७ जनालाई तत्काल सुरक्षित रूपमा राख्न रिसाङ विद्यालय आसपास, विद्यालयभन्दा माथिको क्षेत्र र कल्याणपुरमा टेन्ट, त्रिपाल तथा प्लास्टिकबाट अस्थायी संरचना निर्माण कार्य सुरु भएको छ ।

विस्थापित परिवारलाई वर्षायाममा खुला आकाशमुनि बस्नुपर्ने अवस्था नहोस् भनेर स्थानीयस्तरमै उपलब्ध जग्गाको व्यवस्थापन गरी सेल्टर निर्माण थालिएको हो। प्रभावितलाई राख्न छनोट गरिएका कतिपय स्थानमा मकैबाली लगाइएको थियो। बाली तयार हुनुअघि नै पहिरोले घरबास जोखिममा पारेपछि विस्थापित नागरिकको सुरक्षित बासका लागि मकैबारी फाँडेर अस्थायी संरचना बनाउन थालिएको स्थानीयले बताएका छन्।

रिसाङ विद्यालय नजिक, विद्यालयभन्दा माथिको क्षेत्र र कल्याणपुरमा अस्थायी संरचना निर्माण गरिने भएपछि स्थानीयस्तरमा जग्गा व्यवस्थापनको कामसमेत अघि बढाइएको छ ।

कतिपय स्थानमा मकैबारी फाँडेर सम्याउने र टेन्ट राख्ने तयारी भइरहेको छ । विस्थापित परिवारको संख्या ठूलो भएकाले एउटै स्थानमा राख्न सम्भव नभएपछि तीन ठाउँमा विभाजन गरेर व्यवस्थापन गर्न लागिएको हो।

प्रमुख जिल्ला अधिकारी खडानन्द अधिकारीका अनुसार अस्थायी सेल्टर निर्माणका लागि आवश्यक जग्गा भाडामा लिने विषयमा जग्गाधनी र भेरी नगरपालिकाबीच सम्झौता भइसकेको छ।