बर्दियामा विद्यार्थीको घरदैलोमै पुग्यो लालिगुराँस मावि, शैक्षिक गुणस्तर सुधारमा अभिभावकसँग छलफल

बाँसगढी नगरपालिका–स्थित लालिगुराँस माध्यमिक विद्यालयले विद्यार्थीको शैक्षिक अवस्था र शिक्षामा पहुँचलाई थप प्रभावकारी बनाउने उद्देश्यले घरदैलो अभियान सञ्चालन गरेको छ।
आइतबार विद्यालय व्यवस्थापन समितिका अध्यक्ष ओमप्रकाश पौडेलको नेतृत्वमा विद्यालयका शिक्षक तथा अभिभावक संघका प्रतिनिधिहरू माछागढको दुर्गाफाटा र खैरेनी बस्तीमा पुगेर विद्यार्थी तथा अभिभावकसँग प्रत्यक्ष भेटघाट गरेका हुन्।
टोलीले विद्यार्थीहरूको घरमै पुगेर उनीहरूको पारिवारिक अवस्था, नियमित विद्यालय उपस्थितिको अवस्था, पढाइमा देखिएका समस्या तथा शिक्षामा पहुँचका विषयमा जानकारी लिएको थियो। साथै, विद्यार्थीको सिकाइ उपलब्धि सुधार गर्न अभिभावक, शिक्षक र विद्यालयबीचको सहकार्यलाई थप मजबुत बनाउने विषयमा छलफल गरिएको विद्यालयले जनाएको छ।
घरदैलोका क्रममा विद्यालयमा विद्यार्थीको नियमितता बढाउने, पढाइप्रति रुचि अभिवृद्धि गर्ने, अभिभावकको सक्रिय सहभागिता सुनिश्चित गर्ने तथा समग्र शैक्षिक गुणस्तर सुधार गर्ने विषयलाई प्राथमिकतामा राखिएको थियो।
विद्यालय व्यवस्थापन समितिका अध्यक्ष ओमप्रकाश पौडेलले विद्यालयको शैक्षिक सुधार कक्षाकोठाभित्रको प्रयासले मात्र सम्भव नहुने भन्दै विद्यार्थी, अभिभावक, शिक्षक र विद्यालय व्यवस्थापनबीच निरन्तर सहकार्य आवश्यक रहेको बताएका छन्।
विद्यालयले आगामी दिनमा पनि विद्यार्थीको अवस्था बुझ्न घरदैलो तथा अभिभावक भेटघाटलाई निरन्तरता दिँदै शिक्षाको पहुँचबाट कुनै पनि विद्यार्थी वञ्चित हुन नदिने र गुणस्तरीय शिक्षाका लागि थप प्रभावकारी पहल गर्ने जनाएको छ।