रास्वपा कर्णालीको प्रथम अधिवेशन आज, प्रदेश सभापतिका लागि चार जनाबीच प्रतिस्पर्धा हुने

राष्ट्रिय स्वतन्त्र पार्टी (रास्वपा) कर्णाली प्रदेशको प्रथम अधिवेशन आज (आइतबार)  वीरेन्द्रनगरस्थित शुभ होटलमा सुरु हुँदैछ ।
अधिवेशनको उद्घाटन रास्वपाका महामन्त्री भूपदेव शाहले गर्ने कार्यक्रम रहेको छ । कार्यक्रममा पार्टीका सह–महामन्त्री विपिन आचार्यको समेत सहभागिता रहने बताइएको छ ।
रास्वपा कर्णाली प्रदेश सह–महामन्त्री तथा संगठन विभाग प्रमुख राजबहादुर शाहका अनुसार अधिवेशनको सम्पूर्ण तयारी पूरा भएको छ । कर्णालीका १० जिल्लाबाट ५३० जना प्रतिनिधि छनोट भएर अधिवेशनमा सहभागी हुँदैछन् ।
प्रदेश नेतृत्व चयनका लागि सुरुवातमा पाँच जनाले सभापति पदमा आकाङ्क्षा देखाएका थिए । अधिवेशन नजिकिँदै जाँदा रुकुम पश्चिमका मानबहादुर शाही सभापतिको दौडबाट बाहिरिएका छन् ।
अब वर्तमान सभापति मदन खड्का, उपसभापति प्रेमबहादुर बोहोरा, कोषाध्यक्ष स्नेहा उपाध्याय र नन्दकिशोर बस्नेत (एनके) सभापति पदका सम्भावित दाबेदारका रूपमा देखिएका छन् । रास्वपा प्रदेश नेताहरूका अनुसार मुख्य प्रतिस्पर्धा भने मदन खड्का र प्रेमबहादुर बोहोराबीच हुन सक्ने अनुमान गरिएको छ ।
दैलेखका नन्दकिशोर बस्नेत गत फागुनको निर्वाचनअघि मात्र नेकपा एमालेबाट रास्वपामा प्रवेश गरेका थिए । उनले रास्वपाबाट दैलेख–१ मा प्रतिनिधिसभा सदस्यको निर्वाचन लडे पनि कांग्रेसकी बासना थापासँग पराजित भएका थिए । तर, पार्टी संगठन विस्तारमा सक्रिय भूमिका खेल्न सक्ने भन्दै उनलाई पनि बलियो दाबेदारका रूपमा हेरिएको छ ।
बस्नेतले रास्वपालाई कर्णालीमा बलियो बनाउने उद्देश्यले आफू केन्द्रीय कमिटीमा नबसेको बताएका छन् ।
यस्तै रुकुम पश्चिमका प्रेमबहादुर बोहोरा पनि सभापतिका बलिया आकाङ्क्षीमध्ये एक हुन् । उनी प्रतिनिधिसभा निर्वाचनमा रास्वपाबाट खस आर्यतर्फ बन्दसूचीमा परेका थिए । कर्णालीमा बौद्धिक युवा नेताका रूपमा चिनिएका बोहोरा वीरेन्द्रनगरमा संस्था सञ्चालन गर्दै आएका छन् भने दर्जनौँ पुस्तकका लेखकसमेत हुन् । यसअघि उनी माओवादी हुँदै बाबुराम भट्टराई नेतृत्वको नयाँ शक्ति पार्टीमा आबद्ध थिए ।
सभापति पदकी एक मात्र महिला आकाङ्क्षी स्नेहा उपाध्यायले पनि आफ्नो तयारी भइरहेको बताएकी छन् ।
अधिवेशनले रास्वपा कर्णालीको नयाँ नेतृत्व चयन गर्नेछ।