"स्वदेशमै दक्ष जनशक्ति उत्पादन: मेडिकल शिक्षामा १,३९४ सिट थप"

चिकित्सा शिक्षा आयोगले स्वदेशमै दक्ष जनशक्ति उत्पादन गर्ने उद्देश्यले यस वर्ष मेडिकल शिक्षामा १,३९४ सिट थपेको छ। प्रधानमन्त्री एवं आयोगका अध्यक्ष केपी शर्मा ओलीको अध्यक्षतामा सिंहदरबारमा बसेको २१औं बैठकले एमबिबिएसमा ४९५, बिएस्सी नर्सिङमा ४४० र बिडिएसमा ५० सिट वृद्धि गर्ने निर्णय गरेको हो।

यससँगै एमबिबिएसको सिट संख्या २,६३५ र बिएस्सी नर्सिङको सिट २,४३० पुगेको छ। बिडिएसमा भने ६२५ सिट भएको छ। माग कम भएकाले बिएमएसमा सिट १०० बाट घटाएर ६५ कायम गरिएको छ।

प्रधानमन्त्री ओलीका अनुसार नेपाललाई मेडिकल शिक्षाको हब बनाउने लक्ष्यसहित सिट वृद्धि गरिएको हो, जसले स्वदेशी तथा विदेशी विद्यार्थीलाई अवसर दिनेछ र अर्थतन्त्रमा सकारात्मक प्रभाव पार्नेछ।

हाल नेपालमा स्वास्थ्य शिक्षाका १७ कार्यक्रम सञ्चालन भइरहेका छन्, जसमा सरकारी र निजी गरी ८९ शैक्षिक संस्था छन्। निजी मेडिकल कलेजको हिस्सा ७५ प्रतिशत छ। सरकारले वार्षिक पाँच अर्ब बराबरको पूर्ण छात्रवृत्ति ७५ प्रतिशत विद्यार्थीलाई उपलब्ध गराउँछ भने निजी कलेजले १० प्रतिशत छात्रवृत्ति दिँदै आएका छन्।

यस्तै, प्राविधिक तथा व्यावसायिक तालिम परिषद् (सिटिइभिटी) अन्तर्गत पनि प्रमाणपत्र तहको नर्सिङमा ४० सिट थपिएको छ। हाल २८० शिक्षालयबाट स्वास्थ्य शिक्षा कार्यक्रम सञ्चालन भइरहेको छ।