डा. नवराज केसी: सुर्खेतमा वायु प्रदूषण बढ्दा एलर्जी र दमका बिरामी बढे

सुर्खेत उपत्यकामा पछिल्ला दिनमा सास फेर्दा असहज महसुस हुने समस्या बढ्न थालेको छ। अस्पतालहरूमा एलर्जी, दम, छाती दुख्ने तथा आँखा पोल्ने जस्ता समस्या भएका बिरामीहरूको संख्या पनि बढ्दै गएको चिकित्सकहरूले बताएका छन्।

चिकित्सक डा. नवराज केसीका अनुसार अहिलेको मौसमीय अवस्था र बढ्दो वायु प्रदूषणको मिश्रणका कारण यस्तो समस्या देखिएको हो। उनले पछिल्ला दुई दिनमा अस्पतालहरूमा एलर्जी, दम, छाती दुख्ने र आँखा पोल्ने समस्या लिएर आउने बिरामीहरू उल्लेख्य रूपमा बढेको जानकारी दिएका छन्।

वायु प्रदूषणका कारण श्वासप्रश्वास सम्बन्धी समस्या बढ्न सक्ने भएकाले सर्वसाधारणलाई आवश्यक सावधानी अपनाउन उनले आग्रह गरेका छन्। उनका अनुसार बाहिर निस्कँदा अनिवार्य रूपमा मास्क प्रयोग गर्ने, प्रशस्त पानी पिउने तथा छालालाई सुरक्षित राख्न मोइस्चराइज क्रिम प्रयोग गर्नु लाभदायक हुन्छ।

साथै, उनले नागरिकलाई सचेत र सुरक्षित रहन आग्रह गर्दै बढ्दो वायु प्रदूषण नियन्त्रणका लागि स्थानीय तथा प्रदेश सरकारले वातावरणमैत्री नीति र प्रभावकारी सावधानी अपनाउनुपर्ने आवश्यकता औंल्याएका छन्।