बर्दियाका दुई किशोर फुटबल खेलाडी राष्ट्रिय टोलीको छनोटका लागि काठमाडौं प्रस्थान, स्थानीय तह र युवा सञ्जालबाट विदाई

बर्दिया — बर्दियाबाट दुई जना होनहार किशोर फुटबल खेलाडीहरू राष्ट्रिय U-17 फुटबल टिमको छनोटमा सहभागी हुन काठमाडौं प्रस्थान गरेका छन्। बाँसगढी नगरपालिका निवासी विष्णु चन्द र बारबर्दिया नगरपालिकाबाट एक जना गरी दुई खेलाडीलाई मंगलबार विशेष कार्यक्रमका बीच विदाई गरिएको हो।

बाँसगढी नगरपालिका–५ का वडाध्यक्ष श्री दहवा थारू र युवा सञ्जाल बाँसगढीका अध्यक्ष एकनारायण अधिकारीको अगुवाइमा आयोजित कार्यक्रमले खेलाडीहरूलाई शुभकामना र प्रेरणासहित बिदा गरेको हो।

कार्यक्रममा अध्यक्ष अधिकारीले भने, “खेलाडीलाई माया गरौं, खेलमा लगानी गरौं, खेलकुदको विकास गरौं। प्रिय भाइहरू, तपाईंहरू देशको लागि खेल्न जाँदै हुनुहुन्छ, हामी विश्वस्त छौं—तपाईंहरूको मेहनत रंग ल्याउनेछ।”

वडाध्यक्ष थारूले पनि स्थानीयस्तरबाट राष्ट्रियस्तरको मैदानमा पुगेका खेलाडीहरूप्रति गर्व गर्दै भने, “युवाहरूको प्रतिभा चिन्ने र प्रोत्साहन गर्ने काममा हामी सदैव साथमा छौं।”

युवा सञ्जाल बाँसगढीको समन्वयमा भएको यो विदाई कार्यक्रमले खेलकुदप्रतिको सकारात्मक दृष्टिकोण र स्थानीय तहको समर्थनलाई उजागर गरेको छ। यस्ता कदमहरूले खेलाडीहरूमा आत्मबल र उत्साह थप्ने मात्र नभई बर्दिया जस्ता क्षेत्रहरूबाट पनि राष्ट्रिय प्रतिभा जन्मन्छ भन्ने उदाहरण प्रस्तुत गरेको छ।