दुर्गा प्रसाईं भारतको आसाममा आत्मसमर्पण,

राजसंस्थाको पुनर्स्थापनाको मागसहित देशव्यापी आन्दोलनको नेतृत्व गर्दै आएका विवादास्पद मेडिकल व्यवसायी दुर्गा प्रसाईंले भारतको आसाम राज्यको प्रहरीले खोजी गरिरहँदा आत्मसमर्पण गरेका छन्।

प्रसाईं केही समयदेखि भारततर्फ रहेको भनिएपनि आधिकारिक पुष्टि भएको थिएन। तर, आसाम प्रहरीले बुधबार पुष्टि गर्दै उनलाई नियन्त्रणमा लिएको जनाएको छ।

राष्ट्र, राष्ट्रियता, धर्म संस्कृति तथा नागरिक बचाउ महाभियानका संयोजक रहेका प्रसाईंमाथि चैत १५ गते तीनकुनेमा हिंसा भड्काएको आरोप छ, उनले आफैँले गाडी चलाएर प्रहरीलाई किच्नेशैलीमा पेलेका थिए । त्यसपछि अवस्था उग्र बन्दै दुई जनाको ज्यान समेत गएको थियो । घटनालगत्तै फरार भएका उनी भारत भागेका थिए ।

प्रसाईंले पछिल्ला महिनाहरूमा आफ्ना गतिविधि तीव्र बनाएका थिए। विशेषतः काठमाडौंमा भएको तिनकुने प्रदर्शनपछि उनी भूमिगत जस्तै भएका थिए। उनले सामाजिक सञ्जालमार्फत भने  नेपाल मै भएको दाबी गरेका थिए।
यस घटनाले राजसंस्था समर्थक आन्दोलनमा के असर पार्नेछ भन्ने प्रश्न उठिरहेको छ। प्रसाईंको आत्मसमर्पणले उनका समर्थकहरूमा निराशा उत्पन्न हुनसक्ने अनुमान विश्लेषकहरू गर्दैछन्। यद्यपि, उनका निकटवर्तीहरूले आन्दोलनको मर्म बाँचिरहने दाबी गरेका छन्।

नेपाल सरकारले भने औपचारिक धारणा सार्वजनिक गरेको छैन। अन्तर्राष्ट्रिय न्यायिक सहयोगका आधारमा प्रसाईंको प्रत्यर्पण सम्भव हुने देखिन्छ।
यस घटनाले प्रसाईं नेतृत्वको आन्दोलन अब कुन मोड लिन्छ भन्ने चासो आमजनमानसमा बढेको छ।