बर्दिया–काठमाडौं यात्रामा नयाँ विकल्प: ‘श्रीपेच होलिडेज’ एसी बस सुरु

लामो दूरीको यात्रालाई सहज र आरामदायी बनाउने उद्देश्यसहित बर्दिया–काठमाडौं रुटमा ‘श्रीपेच होलिडेज’ नामक सुविधा सम्पन्न एसी बस सेवा सुरु गरिएको छ। बर्दिया कृष्णसार यातायात व्यवसायी प्रा.लि.ले वैशाख ९ देखि यो सेवा सञ्चालनमा ल्याएको हो।

कम्पनीका अध्यक्ष रवि मल्ल ठकुरीका अनुसार यात्रुको चाहना र बदलिँदो समयअनुसारको सेवा दिन आधुनिक सुविधायुक्त बस सञ्चालनमा ल्याइएको हो। उनले सुरक्षित र गुणस्तरीय यात्रा प्रदान गर्नु मुख्य लक्ष्य रहेको बताए।

बसमा सुत्न मिल्ने स्लिपर बेड, आरामदायी सोफा सिट, निःशुल्क वाइफाइ, सिसी क्यामेरा, जिपिएस प्रणाली र मोबाइल चार्जिङ जस्ता सुविधाहरू उपलब्ध छन्। विशेषगरी लामो दूरीमा यात्रा गर्ने यात्रुलाई लक्षित गरी आराममा ध्यान दिइएको कम्पनीको भनाइ छ।

हाल यो सेवाअन्तर्गत चारवटा बस बर्दिया–काठमाडौं रुटमा सञ्चालनमा छन्। यातायात क्षेत्रका सरोकारवालाले यसलाई स्तरीय सेवातर्फको सकारात्मक कदमका रूपमा लिएका छन्।

स्थानीय व्यवसायीहरूका अनुसार आफ्नै लगानीमा सुरु गरिएको यस सेवाले बर्दियाबाट राजधानी यात्रा गर्ने यात्रुहरूलाई नयाँ विकल्प मात्र होइन, थप सहजता र भरोसा पनि दिने अपेक्षा गरिएको छ।