सुर्खेतकी सर्जक हिमा रोकालाई ‘विश्व–ज्योति युवा पाण्डुलिपि पुरस्कार’

नेपाली वाङ्गमयको श्रीवृद्धिमा क्रियाशील एपेक नेपालले यस वर्षको ‘विश्व–ज्योति युवा पाण्डुलिपि पुरस्कार’ कर्णाली प्रदेश, सुर्खेतकी सर्जक हिमा रोका “प्रतिज्ञा”को लघुकथा पाण्डुलिपिलाई प्रदान गर्ने निर्णय गरेको छ।
४० वर्षमुनिका युवा सर्जकलाई लक्षित यो पुरस्कारअन्तर्गत देश–विदेशबाट प्राप्त पाण्डुलिपिमध्ये उत्कृष्ट कृतिलाई पुस्तकका रूपमा प्रकाशन गरिने व्यवस्था छ।

सोहीअनुसार रोकाको पाण्डुलिपि पुस्तकका रूपमा प्रकाशित भई चैत २५ गते काठमाडौंमा आयोजना हुने एपेक नेपालको २७औँ वार्षिकोत्सव समारोहमा लोकार्पण गरिनेछ।
सुर्खेतको घुमखहरेमा जन्मिएकी हिमा हाल गुर्भाकोट नगरपालिका–मेहेलकुनामा बसोबास गर्दै लघुकथासँगै गजल, मुक्तक, टुक्का कविता र झिल्कामा सक्रिय रूपमा कलम चलाउँदै आएकी छन्।

गत वर्षबाट सुरु गरिएको उक्त पुरस्कार अघिल्लो वर्ष सुदूरपश्चिमका कवि हेमन्त शिशिरको ‘बन्द घरको झ्याल’ कृतिलाई प्रदान गरिएको थियो।