तातोपानी धारा : जहाँ नुहाएपछि निको हुन्छन् यस्ता रोग

जुम्लाको सिंजा गाउँपालिका ५ फुङ्ग्र गाउँकी ४५ वर्षीया जौकली रोकायालाई ढाँड र खुट्टाको जोर्नी दुख्ने समस्या थियो। तातोपानी धारामा नुहाउन थालेदेखि उनलाई सन्चो भएको छ।

जौकली जस्तै तातोपानी धारामा नुहाएर विभिन्न समस्या ठीक भएको सुनाउने धेरै भेटिन्छन्।विभिन्न अस्पतालमा उपचार गराएर रोग निको नभएका दीर्घरोगीहरूका लागि आजभोलि कर्णालीकै पर्यटकीयस्थल मानिने जुम्लाको तातोपानी गाउँपालिका २ जर्मी गाउँमा अवस्थित तातोपानी धारा प्राकृतिक उपचारका लागि आकर्षक स्थल बन्दै गएको छ।

त्यहाँ बाह्य तथा आन्तरिक पर्यटकको भीड बढ्दै छ। 'उपचार केन्द्रको गन्तव्य' बनेको तातोपानी धारा पछिल्लो समय विदेशी पर्यटकहरू समेत बाक्लो रूपमा आउने गरेको स्थानीय बताउँछन्। बाथरोग, ढाँड दुख्ने, घुँडा दुख्नेलगायतका समस्याले ग्रसित मानिसहरू तातोपानी नुहाउन पुग्ने गर्दछन्।

मूलबाट निस्कने प्राकृतिक तातोपानी धारामा नुहाएपछि चिसोबाट हुने रोग, ग्यास्ट्रिक, सडके मर्केको रोगीहरू निको भएर फर्किने गरेका कारण दर्जनौं  बिरामीहरू आउने गरेको स्थानीय बताउँछन्। तातोपानी कुण्डमा डुबेर स्नान गरेमा बाथ, ग्यास्ट्रिक, गानोगोला, चर्मरोगदेखि लिएर प्यारालाइसिसजस्ता रोग निको हुने जनविश्वास यहाँ छ।