पूर्वराजा शाहको गतिविधिबाट सरकार चिन्तित, नियन्त्रणका विभिन्न विकल्पमाथि छ्लफल

फागुन ७ गते राजाले सार्वजनिक रूपमा गरेको सम्बोधनपछि उनीप्रति जनमानसमा आकर्षण बढेको र उनका गतिविधिहरू बढ्न थालेपछि सरकार झस्केको छ।

राजनीतिक दलका कार्यकर्ताहरू नै पूर्वराजाको गतिविधिमा सहभागी हुन थालेपछि सरकार र दलहरू नियन्त्रणको उपायबारे छ्लफलमा लागेका हुन्।

पूर्वराजा शाहले गत फागुन ७ गते जारी गरेको भिडियो सन्देशमा आफूलाई साथ दिन सबैसँग आह्वान गरेका थिए।

पूर्वराजाको आह्वानपछि राजनीतिक दलका नेताहरूले उनीप्रति चर्को कटाक्ष गर्दै आएका छन्। पूर्वप्रधानमन्त्री बाबुराम भट्टराईले उनलाई नियन्त्रणमा लिनुपर्नेसम्मको अभिव्यक्ति दिएका थिए।

कांग्रेस एमाले सम्मेलित केपी ओली नेतृत्वको सरकारले पूर्वराजाका गतिविधिलाई नियन्त्रणमा लिने तयारी गरेको विश्वस्त स्रोतले देश सञ्चारलाई जानकारी दियो।

बुधबार बेलुका बसेको मन्त्रिपरिषदको बैठकमा पूर्वराजाको गतिविधि नियन्त्रण गर्ने विषयमा छलफल भएको छ।

विपक्ष विपक्षी दलहरूको समेत साथ लिएर राजाका गतिविधि निस्तेज पार्नुपर्ने निष्कर्ष निकाल्दै मन्त्रिपरिषदले ठोस कुनै निर्णय नगरेको एक मन्त्रीले जानकारी दिए।

सरकारले पूर्वराजाको गतिविधि निर्मल निवासमै सीमित गर्नेसम्मको योजना बनाएको छ। तर, सुरक्षा निकायका उच्च अधिकारीहरूले भने राजाका गतिविधिलाई निस्तेज पार्न त्यो हदसम्मको कदम चाल्न उपयुक्त नहुने सुझाव दिएका छन्।