एमाले ११औँ महाधिवेशन: ९५ प्रतिशत मतसहित प्रतीक्षा तिवारी ‘म्यान अफ द इलेक्सन’ भएकी छिन्,

नेकपा (एमाले) को ११औँ महाधिवेशनबाट नयाँ नेतृत्व चयनका लागि भएको निर्वाचनमा प्रतीक्षा तिवारी केन्द्रीय सदस्यतर्फ सर्वाधिक मत प्राप्त गर्दै ‘म्यान अफ द इलेक्सन’ घोषित भएकी छन्।

बिहीबार सार्वजनिक अन्तिम नतिजाअनुसार अध्यक्षमा निर्वाचित केपी शर्मा ओलीसहित ३०१ सदस्यीय केन्द्रीय समितिका उम्मेदवारमध्ये तिवारीले खसेको मतको ९५ प्रतिशत अर्थात् २ हजार १२० मत प्राप्त गरेकी हुन्। कुल २ हजार २६३ प्रतिनिधिमध्ये ९८ प्रतिशत अर्थात् २ हजार २२७ मत खसेको थियो।

विघटित प्रतिनिधि सभाकी सदस्यसमेत रहेकी तिवारी यसअघि तत्कालीन नेकपा (माओवादी केन्द्र)बाट दोस्रो संविधान सभा सदस्य निर्वाचित भएकी थिइन्। उनी एमालेको १०औँ महाधिवेशनमा निर्विरोध केन्द्रीय सदस्य चयन भएकी थिइन्।

केन्द्रीय सदस्यतर्फ दोस्रो सर्वाधिक मत मधेशी महिलाबाट निर्वाचित सविता यादवले प्राप्त गरिन्। यादवले खसेको मतको ९२ प्रतिशत अर्थात् २ हजार ५२ मत पाएकी छन्। यस्तै ९१ प्रतिशत अर्थात् २ हजार ४४ मत प्राप्त गर्दै भगवती चौधरी र ज्वालाकुमारी साह संयुक्त रूपमा तेस्रो स्थानमा रहे। दुवै जना विघटित प्रतिनिधि सभामा प्रत्यक्षतर्फ निर्वाचित सदस्य हुन्।

९० प्रतिशतभन्दा बढी मत प्राप्त गर्ने अन्य उम्मेदवारमा मधेशी महिलातर्फ रामरतीदेवी रामले २ हजार ३९ मत र बागमती प्रदेश महिलातर्फ निरकुमारी कुँवर उर्फ निरु दर्लामीले २ हजार ५ मत प्राप्त गरेकी छन्। करिब ९० प्रतिशत मत कटाउनेमा मधेश प्रदेश महिलातर्फबाट निर्वाचित सरिताकुमारी गिरी (यादव) रहेकी छन्, जसले २ हजार ३ मत प्राप्त गरिन्।

महाधिवेशनको निर्वाचन परिणामले महिला नेतृहरूको प्रभावशाली उपस्थितिलाई उजागर गर्दै एमालेको आगामी नेतृत्व संरचनामा उनीहरूको भूमिकालाई अझ सशक्त बनाएको छ।