नेपाली कांग्रेस सुधार अभियान (अन्डर ४०) : सुर्खेतको संयोजकमा बालकृष्ण हमाल चालिसे

नेपाली कांग्रेस सुधार अभियान (अन्डर ४०) ले संगठन विस्तारलाई तीव्र बनाउँदै जाँदा सुर्खेत जिल्लाको नेतृत्व जिम्मेवारी युवा नेता बालकृष्ण हमाल चालिसेलाई दिएको छ। काठमाडौंस्थित केन्द्रीय कार्यालयले जारी गरेको सूचनामा हमाललाई जिल्ला संयोजक नियुक्त गरिएको उल्लेख छ।

जिल्लामा कुशल, सक्रिय र लोकप्रिय युवा नेताका रूपमा पहिचान बनाइसकेका हमाल संयोजक बनेपछि कांग्रेसभित्र मात्र होइन, सुर्खेतको स्थानीय राजनीतिक वृत्तमा समेत सकारात्मक उत्साह पैदा भएको छ। सुधार अभियानले पारदर्शी नेतृत्व, उत्तरदायित्व र सुधारवादी धारालाई मजबूत बनाउन ४० वर्षमुनिका दक्ष युवाहरूलाई अगाडि ल्याउने रणनीति अवलम्बन गर्दै आएको छ।

नयाँ जिम्मेवारीसँगै हमालले सुधार अभियानलाई जिल्लास्तरमा गतिशील, योजनाबद्ध र परिणाममुखी बनाउने प्रतिबद्धता व्यक्त गरेका छन्। “४० वर्षमुनिका युवाको आवाज, आकांक्षा र ऊर्जालाई पार्टीभित्र प्रभावकारी रूपमा प्रतिनिधित्व गर्दै सुधारको बाटोलाई अझ सबल बनाउनु मेरो पहिलो प्राथमिकता हुनेछ,” उनले जनाए।

सुधार अभियानले सुर्खेतमा सक्रिय युवाहरूलाई एकीकृत गर्दै संगठन सुदृढीकरण, पारदर्शिता वृद्धि र पटक–पटक उठाइँदै आएका सुधारका मुद्दाहरूलाई व्यवहारिक रूपमा लागू गर्ने अपेक्षा राखिएको छ।
हमालको नेतृत्वले जिल्लामा युवामुखी राजनीति र संस्थागत सुधारमा नयाँ ऊर्जा र दिशा प्रदान गर्ने विश्वास गरिएको छ।