नेकपा एमाले जाजरकोटबाट महाधिवेशन प्रतिनिधि सर्वसम्मत चयन

नेकपा एमाले जाजरकोटबाट महाधिवेशनका सबै प्रतिनिधि निर्विरोध चयन भएका छन्।

खुला तर्फ लालबहादुर महतारा, करबिर शाही, नरेन्द्र शाही, नारायण घर्ती र प्रेमबहादुर सिंह निर्विरोध रूपमा चयन भए।

३२ वर्षे उमेर सीमा लागू भएपछि अनेरास्ववियुका पूर्व उपाध्यक्ष नारायण घर्ती पुनः भूगोलको सक्रिय राजनीतिमा फर्किएका थिए। उनीसहितका सबै खुलातर्फका नेताहरू सर्वसम्मत रूपमा चयन भएका हुन्।

महिला तर्फ तारा शाक्य, कुमारी थापा र सुनिता बोहरा निर्विरोध प्रतिनिधि बने भने दलित तर्फ गोपाल नेपाली, नवेन्द्र नेपाली र कौशिला कामी चयन भए।

चयनमा परेनन् भन्दै केही कार्यकर्ताले तप्तबहादुर हमाल र राजन थापाको नाम नआएको विषयमा सामाजिक सञ्जालमा असन्तुष्टि व्यक्त गरेका छन्।

तर राजन थापाले सामाजिक सञ्जालमार्फत चयनमा परेकालाई शुभकामना दिँदै लोकतान्त्रिक प्रक्रियाप्रति सम्मान प्रकट गरेका छन्।

तप्तबहादुर हमालले पनि आफू असन्तुष्ट नभएको बताउँदै, “छनोटमा परेकालाई हार्दिक शुभकामना, संगठनका काममा निरन्तर साथ रहनेछु,” भने।

चयनित प्रतिनिधिहरूको प्रतिक्रिया

दलित तर्फ निर्विरोध चयन भएका गोपाल नेपालीले भने,

“पार्टीले दिएको विश्वास सम्मान हो। विविध समुदायको आवाज संस्थागत रूपमा उठाउने जिम्मेवारी अझ बढेको छ।”

खुलातर्फ चयन भएका नरेन्द्र शाहीले प्रतिक्रिया दिँदै भने,

“जाजरकोटको संगठन विस्तार र कार्यकर्ताको मनोबल वृद्धिमा केन्द्रित भएर काम गर्नेछु। सबैको साथ र विश्वासका लागि धन्यवाद।”

जाजरकोटमा प्रतिनिधि चयन प्रक्रियाले समग्रमा सौहार्दपूर्ण वातावरण प्रस्तुत गरे पनि केही व्यक्तिको असन्तुष्टि र प्रतिक्रियाले पार्टीभित्रको आन्तरिक गतिशीलता प्रस्ट पारेको देखिन्छ।