सिंगापुरका राष्ट्रपतिसँग अर्थमन्त्री खनालको भेट, आर्थिक समृद्धिका पाँच आधारमा ध्यान दिन सुझाव

अर्थमन्त्री रामेश्वरप्रसाद खनालले सिंगापुरका राष्ट्रपति थरमन शानमुगारत्नमसँग भेटवार्ता गरेका छन्।

विश्व बैंक समूहको वार्षिक बैठकमा सहभागी हुन अमेरिका पुगेका मन्त्री खनालले साइडलाइन बैठकमार्फत राष्ट्रपति थरमनसँग भेट गरेका हुन्। भेटका क्रममा नेपालको हालको राजनीतिक परिवर्तन र आगामी आर्थिक प्राथमिकताका विषयमा दुबैबीच विस्तृत छलफल भएको अर्थमन्त्री खनालले जानकारी दिएका छन्।

भेटमा राष्ट्रपति थरमनले नेपालले द्रुत गतिको आर्थिक समृद्धि हासिल गर्न पाँच मुख्य क्षेत्र—मानव पुँजी, पूर्वाधार, ऊर्जा, व्यापार र खुलापन—मा विशेष ध्यान दिनुपर्ने सुझाव दिएका छन्।

यसैक्रममा अर्थमन्त्री खनालले अन्तर्राष्ट्रिय वित्त निगम (IFC) का कार्यवाहक क्षेत्रीय उपाध्यक्ष एलेन फरलेमुसँग पनि छुट्टै भेटवार्ता गरेका छन्। उक्त भेटमा नेपालमा निजी क्षेत्रको वृद्धिका लागि सहयोग, लगानी वातावरण सुधार, र आइएफसीसँगको साझेदारीका विषयमा छलफल भएको वाशिङ्टनस्थित नेपाली दूतावासले जनाएको छ।

भेटमा नेपाल राष्ट्र बैंकका गभर्नर डा. विश्वनाथ पौडेल, दूतावासका प्रतिनिधिहरू, अर्थमन्त्रालयका अधिकारी तथा आइएफसीका प्रतिनिधिहरूको पनि सहभागिता रहेको थियो।