अलास्कामा पुटिन–ट्रम्प भेट, युक्रेन युद्धबारे तीन घण्टा छलफल

रुसी राष्ट्रपति भ्लादिमिर पुटिन र अमेरिकी राष्ट्रपति डोनाल्ड ट्रम्पबीच शनिबार अमेरिकाको अलास्कामा भेटवार्ता भएको छ।

दश वर्षपछि अमेरिकाको भ्रमणमा पुगेका पुटिनलाई बी–२ बमवर्षक विमानले स्वागत गरेको थियो। रातो कार्पेटमा अवतरण गरेलगत्तै राष्ट्रपति ट्रम्पले उनको प्रशंसा गरेका थिए। त्यसपछि दुवै नेता ट्रम्पको कारमार्फत बैठकस्थलतर्फ गएका थिए।

करिब तीन घण्टासम्म चलेको वार्तामा दुवै नेताले युक्रेन युद्ध अन्त्य गर्ने विषयमा गम्भीर छलफल गरेका थिए। वार्ता पछि आयोजित संयुक्त पत्रकार सम्मेलन करिब १२ मिनेट मात्रै चलेको थियो। तर सो क्रममा दुवैले पत्रकारका प्रश्नको जवाफ दिएका थिएनन्।

पत्रकार सम्मेलनमा राष्ट्रपति ट्रम्पले बैठकलाई “धेरै सकारात्मक” भएको बताए। उनले भने, “हामी धेरै विषयमा सहमत भयौँ तर अझै कुनै सम्झौता भएको छैन। अन्तिम रूप पाएपछि मात्र सम्झौता हुनेछ।”

राष्ट्रपति पुटिनले भने, “रुसको सुरक्षा मेरो लागि सबैभन्दा महत्वपूर्ण छ।” उनले आगामी बैठक मस्कोमा गर्ने प्रस्तावसमेत राखे। त्यसपछि दुवै नेता पत्रकार सम्मेलनस्थलबाट बाहिरिएका थिए।