कांग्रेसले मुख्यमन्त्री लामाविरुद्धको अविश्वास प्रस्तावमा केन्द्रीय प्रतिनिधि खटायो

नेपाली कांग्रेस बागमती प्रदेशसभा संसदीय दलका नेता तथा मुख्यमन्त्री बहादुरसिंह लामाविरुद्ध दर्ता भएको अविश्वासको प्रस्तावपछि पार्टीले केन्द्रीय प्रतिनिधि खटाएको छ। पार्टीको निर्णयअनुसार संघीय सांसद राजेन्द्र केसीलाई पर्यवेक्षकका रूपमा पठाइएको हो।

कांग्रेस संसदीय दलको विधानको दफा २२ को उपदफा २ अनुसार नेताविरुद्धको अविश्वास प्रस्ताव पारित भएको मान्न त्यस्तो प्रस्तावमा दलका कुल सदस्य संख्याको ५० प्रतिशतभन्दा बढीको समर्थन आवश्यक हुन्छ। साथै, सो बैठकमा पार्टी सभापति, महामन्त्री वा केन्द्रीय समितिद्वारा खटाइएको पर्यवेक्षकको उपस्थिति अनिवार्य गरिन्छ। सोही प्रावधानअनुसार केसीलाई खटाइएको कांग्रेसले जनाएको छ।

मुख्यमन्त्री लामाविरुद्ध कांग्रेस बागमती प्रदेश सभापति इन्द्र बानियाँको नेतृत्वमा २१ जना सांसदले हस्ताक्षरसहित शुक्रबार अविश्वास प्रस्ताव दर्ता गराएका थिए। बागमती प्रदेशसभामा कांग्रेसका ३७ जना सांसद छन्।

तर, मुख्यमन्त्रीबाट भने लामालाई हटाउन सहज नदेखिएको छ। पार्टी नेतृत्वको निर्देशन नमानेका लामा काठमाडौंमै बसेर आफ्नो पक्षमा समर्थन जुटाउने प्रयासमा सक्रिय छन्। ‘संसदीय दलको नेता फेरिने हो, म त अझै पनि मुख्यमन्त्री छु नि,’ उनले भनेका छन्।

यदि उनी मुख्यमन्त्रीबाट राजीनामा नदिए अविश्वासको प्रस्तावमा असफल भएपछि आगामी दुई वर्षसम्म फेरि प्रस्ताव दर्ता गर्न नपाइने संवैधानिक व्यवस्था छ, जसले उनलाई थप बलियो बनाएको छ।