डा. शेखर कोइरालाको भनाइ: "शक्ति सन्तुलनबिना लोकतन्त्र फस्टाउन सक्दैन"

काठमाडौं, असार ११ – नेपाली कांग्रेसका वरिष्ठ नेता डा. शेखर कोइरालाले कार्यपालिका, व्यवस्थापिका र न्यायपालिकाबीच शक्ति सन्तुलन कायम हुन आवश्यक रहेको बताएका छन्।

आइतबार कर्मयोगी बन्द्रीविक्रम थापा स्मृति गुठीद्वारा आयोजित पूर्वप्रशासक थापाको १०३औं जन्मजयन्ती कार्यक्रमलाई सम्बोधन गर्दै उनले मुलुकमा लोकतन्त्रको सफल कार्यान्वयनका लागि राज्यका प्रमुख अंगहरूबीच सन्तुलन अनिवार्य भएको उल्लेख गरे।

‘शक्ति सन्तुलन नभएमा लोकतन्त्रमाथि नै चुनौती आउन सक्छ,’ कोइरालाले भने, ‘संवैधानिक परिषद् लगायतका निकायबाट हुने निर्णय निष्पक्ष र तटस्थ हुनुपर्छ।’

उनले वर्तमान अवस्थामा मुलुकको प्रशासनमा दलीयकरण हाबी भएकोप्रति चिन्ता व्यक्त गरे। ‘अहिले श्रद्धा जगाउने प्रशासक पाउन मुस्किल छ,’ कोइरालाले भने, ‘राज्यका निकायमा रहेका व्यक्तिहरूले आफ्ना नजिकका व्यक्तिको छनोट गर्नु होइन, राष्ट्रलाई प्राथमिकतामा राखेर काम गर्नुपर्छ।’

कार्यक्रममा कोइरालाले प्रजातन्त्र स्थापनाका संघर्षमा योगदान दिने व्यक्तिहरूप्रति सम्मान प्रकट गर्दै, तिनको स्मृतिलाई प्रेरणाका रूपमा लिनुपर्ने धारणा राखे।