प्रचण्डको चेतावनी : "सरकारप्रतिको आक्रोश बेवास्ता भए ठूलो जनआन्दोलन हुन सक्छ"

नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले सरकारप्रतिको जनआक्रोशलाई बेवास्ता गरिए ठूलो जनआन्दोलनको परिस्थिति सिर्जना हुने चेतावनी दिएका छन्।

माओवादी केन्द्रद्वारा सञ्चालित मध्यपहाडी लोकमार्ग जागरण अभियानअन्तर्गत शुक्रबार बागलुङमा आयोजित जनसभालाई सम्बोधन गर्दै अध्यक्ष प्रचण्डले जनतामा दिनप्रतिदिन बढ्दै गएको आवेग र आक्रोशको संकेत गर्दै सरकार उल्टो दिशामा हिँडिरहेको आरोप लगाए। "यदि सरकारप्रतिको आक्रोशलाई समयमा सम्बोधन गरिएन भने परिस्थितिले ठूलो जनविद्रोह निम्त्याउन सक्छ," उनले भने।

उनले प्रतिपक्षको हैसियतले सरकारलाई खबरदारी गर्दै आएको तर आन्दोलनको औपचारिक अपिल भने नगरेको बताए। "सरकार यही गतिमा अघि बढिरहे बर्खापछि ठूलो जनआन्दोलन अपरिहार्य बन्छ," प्रचण्डले चेतावनी दिए।

विगतको सन्दर्भ झल्काउँदै उनले माओवादीले उठाएका मुद्दाहरूलाई राज्यले गम्भीरतापूर्वक नलिँदा १० वर्षे सशस्त्र संघर्ष हुन पुगेको स्मरण गराए। साथै, आफू प्रधानमन्त्री हुँदा भएका थुप्रै सकारात्मक कामहरू अहिलेको सरकारले बदनियतपूर्वक बिथोलेको आरोप समेत लगाए।

माओवादी पार्टीलाई बलियो बनाउन देशभर नेताहरू दौडाहामा रहेको उल्लेख गर्दै उनले माओवादी बलियो भए मात्र भ्रष्टाचारको अन्त्य, नयाँ आर्थिक क्रान्ति र समाजवादको नयाँ मोडल सम्भव हुने दाबी गरे।