शिक्षकसँगको वार्तामा गृहमन्त्री लेखक पनि सहभागी

नेपाल शिक्षक महासंघका पदाधिकारीहरूसँगको वार्तामा गृहमन्त्री रमेश लेखक पनि सहभागी भएका छन् । शिक्षा मन्त्रालयमा जारी वार्तामा गृहमन्त्री लेखक पनि सामेल भएका हुन् ।

आजको वार्ताले ठोस निकास दिने अपेक्षा गरिएको छ । सरकारसँग वार्तामा बस्नुअघि शिक्षक नेताहरू गोप्य बैठकमा बसेका थिए । बैठक सकेर उनीहरू शिक्षा मन्त्रालय पुगेका हुन् । 

लगातार सडक प्रदर्शनमा उत्रिएका शिक्षक  र सरकारबीच सोमबार रातिसम्म भएको वार्ता सकारात्मक भनिए पनि कुनै निष्कर्ष ननिस्केकाले आज फेरि छलफल भइरहेको हो ।

शिक्षक महासंघको नेतृत्वमा देशभरका शिक्षक काठमाडौं आएर विगत २८ दिनदेखि शिक्षा ऐन जारी गर्नुपर्नेलगायतका माग राखी प्रदर्शन गरिरहेका छन् । शिक्षकको आन्दोलनका कारण विद्यार्थी भर्ना अभियानसमेत प्रभावित भएको छ ।