बाजुरा-हुम्ला सीमा विवादबारे कर्णालीका मुख्यमन्त्रीले गराए प्रधानमन्त्रीको ध्यानाकर्षण

कर्णाली प्रदेशका मुख्यमन्त्री यामलाल कँडेलले हुम्ला र बाजुराको सिमानामा पर्ने लाम्पाटा–च्याचौर क्षेत्रमा देखिएको सीमा विवादबारे प्रधानमन्त्री वालेन्द्र शाहको ध्यानाकर्षण गराएका छन् ।

मुख्यमन्त्री कँडेलले बिहीबार प्रधानमन्त्री शाहलाई पत्र लेख्दै विगत केही दिनदेखि उत्पन्न सीमा विवादका कारण स्थानीय नागरिकबीच द्वन्द्व बढ्दै गएको तथा शान्ति सुरक्षामा असर परेर जनजीवन प्रभावित भएको उल्लेख गरेका छन् ।

पत्रमा मुख्यमन्त्री कँडेलले दुई जिल्लाबीचको सीमा विवादले थप तनाव सिर्जना गर्न सक्ने भन्दै समयमै आवश्यक सजकता अपनाउन संघीय सरकारलाई आग्रह गरेका छन् । उनले विवादका कारण कुनै पनि प्रकारको थप क्षति हुन नदिन प्रभावकारी पहल आवश्यक रहेको बताएका छन् ।

मुख्यमन्त्री कँडेलले विवाद समाधानका लागि संघीय सरकारले समन्वयात्मक भूमिका निर्वाह गर्दै तत्काल आवश्यक कदम चाल्नुपर्नेमा जोड दिएका छन् । साथै, स्थानीय स्तरमा देखिएको असमझदारीलाई संवाद र सहकार्यबाट समाधान गर्नुपर्ने आवश्यकता औंल्याएका छन्