कर्णालीका स्थानीय तहमा एक चौथाइ कर्मचारी दरबन्दी रिक्त

भौगोलिक रूपमा विकट मानिने कर्णाली प्रदेशका स्थानीय तहहरूमा कर्मचारी अभाव गम्भीर बन्दै गएको छ । प्रदेशभरका ७९ स्थानीय तहमा स्वीकृत दरबन्दीअनुसार करिब एक चौथाइ कर्मचारी पद रिक्त रहेको तथ्य सार्वजनिक भएको हो ।
मुख्यमन्त्री तथा मन्त्रिपरिषद् कार्यालय कर्णाली प्रदेश, सुर्खेतका अनुसार प्रदेशभर कूल पाँच हजार ६६० स्वीकृत दरबन्दीमध्ये एक हजार ३६३ पद रिक्त रहेका छन् । हाल चार हजार २९७ कर्मचारी मात्रै कार्यरत रहेको कार्यालयका सचिव लक्ष्मीकुमार विकले जानकारी दिए ।

कार्यालयले स्थानीय तहबाट प्राप्त विवरणका आधारमा शिक्षा सेवातर्फ पाँचौँदेखि नवौँ/दशौँ तहसम्मका १८३ स्वीकृत दरबन्दीमध्ये १३२ पदमा मात्रै कर्मचारी कार्यरत रहेको जनाएको छ । यस क्षेत्रमा ५१ पद रिक्त छन् ।

इञ्जिनियरिङ सेवामा अवस्था झनै कमजोर देखिएको छ । एक हजार ५५ स्वीकृत दरबन्दीमध्ये ६३४ पदमा मात्रै कर्मचारी कार्यरत छन् भने ४२१ पद रिक्त छन् । सचिव विकका अनुसार यस सेवाको नवौँ/दशौँ तहमा भने कुनै पनि पदपूर्ति हुन सकेको छैन ।
प्रशासन सेवातर्फ एक हजार ५४१ स्वीकृत दरबन्दीमध्ये एक हजार ६४ पदमा कर्मचारी कार्यरत हुँदा ४७७ पद खाली छन् । स्वास्थ्य सेवामा भने तुलनात्मक रूपमा स्थिति राम्रो देखिएको छ । एक हजार ८८४ स्वीकृत दरबन्दीमध्ये एक हजार ७३२ पदमा कर्मचारी कार्यरत छन् भने १५२ पद रिक्त रहेका छन् ।

यस्तै कृषि सेवातर्फ ८१४ स्वीकृत दरबन्दीमध्ये ५७७ पदमा मात्रै कर्मचारी कार्यरत छन् भने २३७ पद खाली रहेका छन् । विविध सेवातर्फ १८३ स्वीकृत दरबन्दीमध्ये १५८ पदमा कर्मचारी कार्यरत छन् भने २५ पद रिक्त छन् ।
स्थानीय तहअनुसार हेर्दा डोल्पाको डोल्पो बुद्ध गाउँपालिकामा सबैभन्दा बढी कर्मचारी अभाव देखिएको छ । त्यहाँ ५३ स्वीकृत दरबन्दीमध्ये १५ जना मात्रै कार्यरत छन् । अर्कोतर्फ वीरेन्द्रनगर नगरपालिका, सुर्खेतमा भने १०५ स्वीकृत दरबन्दीमा ११६ जना कर्मचारी कार्यरत रहेको तथ्यांकले देखाएको छ । अर्थात् उक्त पालिकामा ११ जना कर्मचारी बढी रहेका छन् ।

सचिव विकले डोल्पो बुद्ध गाउँपालिकामा करार सेवामार्फत काम सञ्चालन भइरहेको हुनसक्ने बताए । उनले अब प्रदेश सरकारले सबै स्थानीय तहको रिक्त दरबन्दीको अद्यावधिक विवरण संकलन गरी प्रदेश लोकसेवा आयोगमार्फत पदपूर्तिको प्रक्रिया अघि बढाउने जानकारी दिए ।