भाइरल क्लिपपछि कलाकारको आपत्ति: ‘सन्दर्भ नबुझी गाली–गलौज नगर्नुहोस्’

सामाजिक सञ्जालमा पुरानो भिडियो क्लिप भाइरल भएपछि एक कलाकारले कडा आपत्ति जनाएका छन्। उनले आफ्नो भिडियोको सानो अंश काटेर फेसबुक र टिकटकमा सन्दर्भबिना राखिएको र त्यसपछि कमेन्टमार्फत अपमानजनक गाली–गलौज गरिएको भन्दै दुख व्यक्त गरेका हुन्।

कलाकारका अनुसार उक्त भिडियो करिब एक वर्षअघिको सिरियलको दृश्य हो, जसलाई सामाजिक सन्देश दिनका लागि निर्माण गरिएको थियो। “आजको समाजमा भइरहेका घटनालाई देखाउँदै चेतना दिनका लागि भिडियो बनाइएको हो,” उनले बताएका छन्।

उनले कलाकारको काम सजिलो नभएको भन्दै घाम–पानी, भोक–तिर्खा सहेर मेहनतका साथ काम गर्नुपर्ने अवस्था रहेको उल्लेख गरेका छन्। सन्दर्भ नबुझी कसैको प्रतिष्ठामा चोट पुर्‍याउने गरी भिडियो काटेर भाइरल बनाउनु र गाली गर्नु गलत भएको उनको भनाइ छ।

कलाकारले सामाजिक सञ्जाल प्रयोगकर्तालाई पहिले वास्तविकता बुझेर मात्र प्रतिक्रिया दिन आग्रह गरेका छन्। “आफूलाई कसैले नराम्रो भने मन दुख्छ भने अरूको पनि मन दुख्छ भन्ने कुरा सोच्नुपर्छ,” उनले भने।

उनका अनुसार भिडियोमा कसैलाई फकाएर वा फसाउन खोज्ने घटनाबाट सचेत रहनुपर्ने सामाजिक सन्देश दिन खोजिएको थियो। सानो कुरालाई ठूलो बनाउँदै अपमानजनक टिप्पणी गर्नुको सट्टा कलाकारलाई सम्मान गर्न र जिम्मेवार रूपमा सामाजिक सञ्जाल प्रयोग गर्न उनले सबैलाई आग्रह गरेका छन्।