बर्दियाका एकनारायण अधिकारी ‘नवीन’ इनोभेसन नेशनल युथ भोलेन्टियर अवार्डका लागि अन्तिम १० मा छनोट

बर्दिया जिल्लाको बाँसगढी नगरपालिकाका जुझारु तथा कर्मठ युवा एकनारायण अधिकारी ‘नवीन’ स्वयम्सेवक पुरस्कार (इनोभेसन नेशनल युथ भोलेन्टियर अवार्ड) का लागि अन्तिम १० मा छनोट हुनुभएको छ । सामाजिक सेवामा अविचलित समर्पण, नवीन सोच र नेतृत्व क्षमता प्रदर्शन गर्ने युवाहरूलाई सम्मान गर्न बास नेपालले गत वर्षदेखि प्रदान गर्दै आएको यो प्रतिष्ठित पुरस्कार देशभरकै युवाहरूमाझ निकै लोकप्रिय बन्दै गएको छ ।यस वर्ष देशका विभिन्न कुनाकाप्चाबाट सयौं आवेदन परेका थिए । गत ४ नोभेम्बरमा बास नेपालले प्रारम्भिक रूपमा १५ जनाको नाम सार्वजनिक गरेको थियो । कडा छनोट प्रक्रिया र बायोडाटा भेरिफिकेसनपछि आवश्यक मापदण्ड पूरा गर्ने १० जना युवाहरूको अन्तिम सूची मंसिर १ गते प्रकाशित गरियो, जसमा बर्दियाका एकनारायण अधिकारी पनि सम्मिलित हुनुहुन्छ ।स्थानीय तहदेखि राष्ट्रिय स्तरसम्म सामाजिक परिवर्तनका लागि खटिने युवाहरूको मेहनत र लगनशीलतालाई राज्यले मात्र होइन, नागरिक समाजले पनि कदर गर्नुपर्छ भन्ने सन्देश यो पुरस्कारले दिएको छ । एकनारायणज्यूको यो सफलता बर्दिया मात्र होइन, सिंगो लुम्बिनी प्रदेश र नेपालका ग्रामीण भेगमा बसेर मौन रूपले समाजसेवा गर्ने हजारौं युवाहरूका लागि गर्व र प्रेरणाको स्रोत बनेको छ ।उहाँको यो यात्राले प्रमाणित गर्छ– इमान, लगन र नवीन सोच बोकेका युवा जहाँ भए पनि चम्किन सक्छन् । बाँसगढीका नवीनलाई हार्दिक बधाई तथा यो पुरस्कार जितेर बर्दियाको शिर झनै उँचो बनाउन शुभकामना !