अछाममा जंगली च्याउ खाँदा तीन बालबालिका बिरामी, प्रहरीद्वारा सचेत रहन आग्रह

अछामको रामारोशन गाउँपालिका-७ मा जंगली च्याउ खाँदा तीन जना बालबालिका बिरामी परेका छन्। घर नजिकैको जंगलमा खेल्ने क्रममा विषालु च्याउ खाएका कारण उनीहरूको स्वास्थ्यमा समस्या देखिएको हो।

बिरामी पर्नेमा तारा भण्डारीका दुई वर्षीय छोरा युवराज भण्डारी, चार वर्षीया छोरी रितिका भण्डारी र सोही स्थानका चेतमान भण्डारीका चार वर्षीय छोरा जीवन भण्डारी रहेका छन्। घटनापछि तत्कालै तीनै जनालाई उपचारका लागि न्याय हेल्थ अस्पताल, बयलपाटा लगिएको छ। जिल्ला प्रहरी कार्यालय अछामका प्रमुख प्रहरी नायब उपरीक्षक ईश्वरीप्रसाद भण्डारीका अनुसार हाल उनीहरूको सोही अस्पतालमा उपचार भइरहेको छ र अवस्था स्थिर रहेको छ।

प्रहरीले च्याउ विषालु भएको पुष्टि गरेको छ र अभिभावकहरूलाई जंगली च्याउ खानुअघि विशेष सावधानी अपनाउन आग्रह गरेको छ। बर्खायामको सुरुवातसँगै सुदूरपश्चिमका पहाडी क्षेत्रमा स्थानीयहरूले जंगली च्याउ खोजी खोजी खाने प्रचलन छ। यस्ता घटनाले विषालु च्याउको पहिचान र उपभोगमा सचेतनाको आवश्यकता रहेको प्रहरीको भनाइ छ।

“जंगली च्याउ खाँदा यस्ता घटना बारम्बार दोहोरिने गरेका छन्। अभिभावकहरूले आफ्ना बालबालिकालाई जंगलमा पाइने च्याउ खान नदिन र खानुअघि विषालु हो/होइन यकिन गर्न विशेष ध्यान दिनुपर्छ,” प्रहरी नायब उपरीक्षक भण्डारीले भने।

यो घटनाले स्थानीय समुदायमा जंगली च्याउको उपभोगमा सचेतना फैलाउनुपर्ने आवश्यकता उजागर भएको छ। प्रहरी र स्थानीय प्रशासनले यस्ता घटना न्यूनीकरण गर्न सचेतनामूलक कार्यक्रम सञ्चालन गर्ने तयारी गरेको जनाइएको छ।