हुलाकी सडक र राप्ती पुल निर्माणपछि बाँकेको सोनारी क्षेत्र सुगम र व्यावसायिक हुँदै

बाँकेको राप्ती सोनारी गाउँपालिकाको सोनारी क्षेत्र अब दुर्गम रहेन। कचनापुर र बिनौनालाई जोड्ने राप्ती पुल र हुलाकी सडक निर्माणपछि यस क्षेत्रको पहुँच सुधारिएको छ। अतीतमा राप्ती नदीपारीका बैजापुर, बिनौना र फत्तेपुर दुर्गम मानिन्थे, तर अहिले यी बस्तीहरू सजिलै पुग्न सकिने स्थानमा परिणत भएका छन्।

राप्ती सोनारी गाउँपालिका–३ का वडाध्यक्ष मीनकुमार चौधरीका अनुसार, सडक र पुल बनेपछि स्थानीय जनताले विकासको प्रत्यक्ष अनुभूति गर्न थालेका छन्। "मानिसको आवागमन, चहलपहल र व्यवसायिक कारोबारमा उल्लेख्य वृद्धि भएको छ। घरेलु तथा साना उद्योगसमेत फस्टाउँदै गएका छन्," वडाध्यक्ष चौधरीले बताए।

सडक र पुल बनेपछि राप्तीपारीका धार्मिक तथा पर्यटकीय स्थलमा आन्तरिक पर्यटकको आगमन पनि बढेको छ। बैजापुरमा रहेको प्रसिद्ध भुवरभवानी मन्दिर, बाबा बर्फानी र बिनौनाको धुमैया उद्यान तथा नवनिर्मित राप्ती पुल घुम्न सर्वसाधारणको चहलपहल बढेको छ।

राप्ती सोनारी–५ बिनौनास्थित भुवरभवानी माध्यमिक विद्यालयका प्राचार्य चेतबहादुर बिष्टका अनुसार, पूर्वाधार विकासले स्थानीयको आर्थिक र सामाजिक जीवनमा सकारात्मक परिवर्तन ल्याएको छ। “नेपालगञ्ज–बघौडा हुलाकी सडक विस्तारसँगै कुण्डादेखि नारायणपुर हुँदै अगैयासम्म सिधा पूर्व–पश्चिम राजमार्ग जोडिएको छ,” बिष्टले भने, “यस सडकमार्गले मुख्य राजमार्गभन्दा छोटो यात्रा सुनिश्चित गराउँछ, जसका कारण सवारीसाधनको चाप पनि दिनप्रतिदिन बढ्दै गएको छ।”

राप्ती सोनारी–५ का स्थानीय जमानसिंह वलीका अनुसार, पुल निर्माणसँगै गाउँपालिकाको नदी वारि र पारिबीच सिधा सम्पर्क कायम भएको छ। उनले कृषिमा आधुनिकीकरण र लगानीमार्फत जनताको आर्थिक जीवनस्तर उकास्न अब स्थानीय सरकारले नयाँ योजना ल्याउनुपर्ने आवश्यकता औंल्याए।

हुलाकी सडक र राप्ती नदीमाथिको पुलले सोनारी क्षेत्रको भूगोल मात्रै होइन, यहाँको विकासको गति पनि बदलिदिएको स्पष्ट देखिन्छ। स्थानीय स्तरमा पूर्वाधार विस्तारसँगै अब आर्थिक गतिविधि, पर्यटन र कृषि विकासको समन्वित प्रयास आवश्यक छ।