फुल चोकमा ट्याक्टरको ठक्करबाट दुई युवकको मृत्यु

हरिनगर गाउँपालिका–३ स्थित फुल चोकमा सोमबार दिउँसो भएको सवारी दुर्घटनामा दुई युवकको ज्यान गएको छ।

जिल्ला प्रहरी कार्यालय सुनसरीका प्रवक्ता डीएसपी योगराज खतिवडाका अनुसार पश्चिमबाट पूर्वतर्फ गइरहेको प्रदेश १–०२–००३ त ९०२ नम्बरको ट्याक्टरले विपरीत दिशाबाट आइरहेको प्रदेश १–०२–०५५ प ६२९६ नम्बरको मोटरसाइकललाई ठक्कर दिएको थियो।

ठक्करबाट इनरुवा नगरपालिका–१० का २० वर्षीय सर्पराज अन्सारी र हरिनगर गाउँपालिका–१ का २१ वर्षीय महजित अन्सारी गम्भीर घाइते भएका थिए।

घाइते दुवै जनालाई तत्काल उपचारका लागि सप्तकोशी न्यूरो अस्पताल लगिएको भए पनि सर्पराजको दिउँसो १:५० बजे र महजितको २:२० बजे मृत्यु भएको प्रहरीले जानकारी दिएको छ।

दुर्घटनापछि ट्याक्टर चालक भोक्राहा नरसिंह–३ का ४६ वर्षीय सुब्जी राम चमारलाई नियन्त्रणमा लिई आवश्यक अनुसन्धान अघि बढाइएको प्रहरीले जनाएको छ।