लामिछानेको मुद्दामा आदेशको प्रतीक्षा : ढोका बन्द गरेर न्यायाधीशहरु आदेश लेखनमा

राष्ट्रिय स्वतन्त्र पार्टी (रास्वपा) सभापति रवि लामिछानेको बन्दीप्रत्यक्षीकरण मुद्दामा आज (शुक्रबार) सर्वोच्च अदालतले आदेश सुनाउने तयारी गरेको छ। लामिछानेलाई रिहा गरिनुपर्ने मागसहित दायर रिटमा सुनुवाइ सकिएसँगै आदेशका लागि न्यायाधीशहरु इजलासमा लेखन कार्यमा व्यस्त छन्।

सर्वोच्च अदालतका न्यायाधीशद्वय नहकुल सुवेदी र बालकृष्ण ढकालको संयुक्त इजलासमा उक्त मुद्दाको सुनुवाइ सम्पन्न भएको हो। आदेश लेखनका लागि ढोका बन्द गरिएकाे अवस्थामा न्यायाधीशहरू अन्तिम निष्कर्षमा पुग्ने प्रयासमा छन्।

यसैबीच, रास्वपा समर्थकहरू सर्वोच्च परिसरमा बाक्लो उपस्थिति जनाउँदै रवि लामिछानेको रिहाको आशामा प्रतीक्षा गरिरहेका छन्। 'रवि रिहा होस्' भन्ने नारासहित सर्वोच्च परिसरमा दिनभर उत्सुकता र तनावको माहोल छाएको छ।

लामिछानेलाई बुटवलको सुप्रिम सहकारी ठगी प्रकरणमा पक्राउ गरिएको थियो। उनलाई गैरकानुनी रूपमा थुनिएको भन्दै उनकी पत्नी निकिता पौडेलले सर्वोच्च अदालतमा बन्दीप्रत्यक्षीकरणको रिट दायर गरेकी थिइन्।

देशभरबाट निगरानी गरिएको यो मुद्दा अब केही घण्टामै टुंगोमा पुग्ने छ, जसले नेपालको राजनीतिमा नयाँ तरंग ल्याउने अपेक्षा गरिएको छ।